瘦底有肚腩的健身新手迷思1 (搵教練篇)

回想返我呢個天生瘦底有肚腩嘅中佬，初時諗住一來就可以入Gym Room操練。

但原來入門真係唔需要浪費去Gym Room嘅錢，因為係屋企做一啲只係利用自身重量，無器械動作，已經可以操到半死，當然動作一定要正確。

再者你一開頭根本就唔夠力去做到，同做好要用器械嘅動作，冇錯，肌肉係已經虛弱到呢個地步。

當然唔係人人都咁幸運另一半係健身教練，於是好多人都會諗需唔需要搵教練。

需唔需要健身教練我會咁樣分：

1. 有健身教練 = 事半功倍，幫你編排動作，有你唔需要花時間學嘅運動知識，確保姿勢正確，更可以幫助你去”掙扎”埋最後個兩下。

2. 冇健身教練 + 朋友教 = 睇彩數，通常朋友教嘅，個外形好似好啱，但大多數重點都會有問題。長久練落來一定有嘢睇，不過好大可能唔好睇，因為練來練去都係個幾組肌肉。有時動作做錯又唔知，長期積積下來成為痛症來源之一。當然優點係唔駛錢，但都要你朋友唔嫌棄。

3. 冇健身教練 + youtube自學 = 是梁靜茹給了你勇氣嗎？先唔談論你了唔了解片入面既動作有咩限制同埋適唔適合你既程度。就選適合，你都要確保整個動作同細節都同片中一樣。

最最最重要連個youtuber都做錯，請問你覺得work唔work？

4. 冇健身教練 + 睇人點做就自己做緊 = 不如慳返D錢係屋企涼冷氣算。

所以睇完以上4點，你都好明白應該點選擇。

自己個小朋友都會課金俾佢跟老師上堂，那裡來的想法會認為自己係健身新手但唔需要搵教練？